Tu kaajil Jo’, Yuc, tu kíinil 9 ti’ agosto tu ja’abil- Ichil u k’iimbesajil u Máank’iinil Máasewáal Kaajo’ob Yóok’ol kaabe’, u Mola’ayil u Sáaskunta’al, u Ts’aabal Ojéetbil Meyaj Yéetel u Kanáanta’al Ba’alo’ob Yan u Yil Yéetel Máako’ob ti’ u Xéet’ Lu’umil Yucatán (Inaip Yucatán) tu ts’o’oksaj u yáax jaatsil ka’ansaj xook tu k’abataj Líderes por la transparencia, ichil le meyaja’ táakpaj xan u molayil Article 19 México y Centroamérica, le ka’ansajilo’ beeta’ab tu wíinalilo’ob junio, julio yéetel agosto ti’ le ja’abila’, ichile’ táakpajo’ob 12túulul aj-jo’olil yéetel ix-jo’olil kaajo’ob ku taalo’ob ti’ 12p’éelel méek’tankaajo’ob tu Xéet’ Lu’umil Yucatán.
Le nu’ukbsaja’ ku kaxtik ka k’ajóolta’ak yéetel ka meyajta’ak tu beel u Páajtalil Ojéelalil wa Derecho de Acceso a la Información (DAI) ichil máaxo’ob ku táanilkunsik u kaajalo’ob tia’al ka jóok’ko’ob táanil, le máaxo’ob táakpajo’obo’ jach k’ajóola’an le meyaj ku beetko’ob ichil le maaya kaajo’oba’, Sací, Oxkutzcab, Jo’, Cacalchén, Teya, Mama, Sacalum, Maní, Ticul, Muna, Dzan yéetel Santa Elena, máaxo’ob tu ts’o’ok’sajo’ob le ka’ansaj xookila’ yaan u ts’aiko’ob óojeltbil u Páajtalil Óojelalil wa (DAI) utia’al beyo’ ka u yilo’ob ba’ax talamil ku máansik u kaajo’obo’ yéetel ka béeyak u yutskíintiko’ob.
“U jaajile’ jach ma’alob k-ilik ka ka’ansak u aj-jo’olil yéetel ix-jo’olil kaajo’ob, tumen k-ojle’ jach ma’alob meyaj ku beetiko’ob tu kaajalo’obo’, leti’obe’ u yojlo’ob ma’alob ba’ax talamil ku máansik le kaajo’obo’ tumen ku muk’yajtiko’ob xan yéetel ku meyajo’ob utia’al u jóok’so’ob táanil u kaajo’obo’, yéetel wa ku meyajtiko’ob u páajtalil ojéelalile’ máas ma’alob, tumen beyo’ je’el u páajtal pa’ajoltik tu beel ba’ax kun beetbil, yéetel beyo’ ka ma’alobkíinta’ak u kuxtal le kajnáalo’obo’”, bey úuchik u ya’alik máax ku jo’olintik u Molayil Inaip Yucatán María Gilda Segovia Chab.
Beytúun xano’, máax ku jo’olintik u molayil Article 19 México Centroamérica, Leopoldo Maldonado Gutiérreze’, tu ya’alaje’ le meyaj ka’ansaj beeta’abo’ jump’éel ma’alob e’esajil tia’al u yila’al bix ku mu’uk’ankúunsa’al le bix u táakpajal kaaj, yéetel ku kaxtik u ma’alobkíinsik u talamil le kaajo’obo’ tumen ku béeykuntik u chíimpolta’al uláak’ páajtalilo’ob ka’alikil u meyajta’al u páajtalil ojéelalil.
x-María López Balame’ máax t’aanaj tu k’aaba’ u yéet xooko’obe’, tu ya’alaj tuláakal le ba’ax tu kanaj ichil le ka’ansaj xooko’ táan bin u meyajtik utia’al u jóok’sik táanil u kaajal, yeetel ku meyajtik xan utia’al u chíimpolta’al u páajtalil maaya kaajo’obo’.
Ichil le meyaj beeta’abo’ táakpaj xan le magistradoo’ Pablo Vicente Monroy Gómez leti’e’ tu ts’áaj jump’éel tsikbalil tu k’abataj: Líderes por la transparencia y su incidencia en el Desarrollo comunitario a través del ejercicio de sus derechos.
Deja un comentario